بالخير يا شف الغرام و مراده
عساك طيب يا هوى البال و بخير

يامن صدر حكم القدر في بعاده
أرسلت لك مني تحيه مع الطير

كانه وصلك الحس برسل زياده
لجلك انا قلبي على الجمر بيسير

إسمع كلامي و لا أحب الإعاده
قلب(ن) سمح لك تدخله يمنع الغير

بقلمي

نامي يقول الفكر لا تشغلينه
يرجع لطبعه من تتطبع وكادي

حرام قلبك بالكدر تتعبينه
مع ناس ذبح الحس تحسبه عادي

بقلمي

صاحبك إن ضاق صدرك زاح كربك
ما هو من يضحك بوجهك و يحكي بك

من هرج بالغير لا يمشي بدربك
احذر و لا تامنه لو هو قريبك

العدو ما يرحمك دوم يغدربك
و من طعن بالظهر ما ياتي بطبيبك

عز نفسك تملك العالم بقربك
و من ظلمك قول له ربي حسيبك

من يفكر بالعقل عاذله يربك
و ما يقدّره الولي لابد يصيبك

لو همومك أصبحت زادك و شربك
ارضى بالمقسوم دامه ذا نصيبك

و إن لزمت الصمت خله ينذكر بك
بالذهب موصوف صمتك ما يعيبك

بقلمي

يبان من حرفك لي بسمة شفاتك
و يوصلني احساس الحزن لا قريتك

لا تحاول انك تخفي شي عن غلاتك
اسلوب نبضاتك حفظته فديتك

لو التزمت الصمت ذي من صفاتك
دليل هم(ن) ليت تطرده ليتك

لا تعتقد بان الفرح في حياتك
طاف و نسى لا يمر من صوب بيتك

دنياك لو هي ما على الكيف جاتك
الصبر طبع(ن) يرفع أصداء صيتك

لا تلتفت لامر(ن) مضى ذي وصاتك
دايم أذكّر فيها نفسي إن طريتك

يوم اللقا لو قدر الله ما فاتك
و لو تبعدك الاميال ابد ما نسيتك

بقلمي

رتبت حرف الوجد و النبض زعلان
من زود ضيقه ثار و بعثر حروفي

صدق المحبه قال ما يقاس باوزان
و شوق المشاعر فاق كل الوصوفي

العشق ترجمته ما تحتاج لاعلان
بالحس تكشف من سكن وسط جوفي

و ان كان قلبك ما فهم نبض ولهان
وش فايدة شرح(ن) لمن ما يشوفي

بفلمي

من الأمور التي تسبب القهر

إن تكون مضطرا أن تبتسم
و جروحك تنزف بداخلك

و من الأمور التي تجلب السعادة

أن يكون هناك شخص
بين مجموعة الناظرين إليك
يمكنه قراءة حزنك رغم ابتسامتك .

بقلمي

نيات بعض الناس ما تقصد الشر
لكن يجيك من البشر من يشكك

فاحذر تظن بسوء و تجلب لك الضر
و تعقد امورك و لا احد(ن) يفكك

بقلمي

ما ابدلك لو يدفعوا لي ملايين
يا بعد روحي وين الاقي مثيلك ؟

أنت الهوا و الما و ليّه ضوى العين
و الزاد من دونك يعافه خليلك

بقلمي

وحدي و دمعي فوق خديني همال
أناظر لعصفور صوته يسلي

غرّد و سمّعنى لحن يطرب البال
سجيت فيه بروحي مع طيف خلي

يا ليت لامن طار يشرح له الحال
محبوب همسه عرق قلبي يتلي

بقلمي

لها دعيت و كم تمنيت ضمه
لو هي ثواني تطفي بالجوف نيران

يمه أنا ودي لعطرك أشمه
و ازيح هم(ن) ينكسر منه ميزان

في جنة الفردوس أدعيه يمه
رب(ن) ما يمنع دعوته صك بيبان

بقلمي

ذا الوقت فيه الفرح موجود نوعين
فرحة لقانا و فرحة اعدانا بفراق

بعض العرب عندك يجي معه وجهين
يضحك و إذا شاف السعد صوبكم ضاق

بقلمي

هانت على نبض الأمل دمعة الياس
لجل المحبه ما يجي لدربها سد

شدت عزوم(ن) ثم بنت للفرح ساس
و اهدت عيون الحس ذوق(ن) بلا حد

بقلمي

لا تكتم احساسك ترى النبض مفضوح
لامن مسكت ايدك نطق كل ما فيك

لا تحسب التعتيم لك أمر مسموح
فضفض و يسمع لك بإمعان مغليك

إن كان ظنك تهدم بصمتك اصروح
غلطان و سامحني صرخ قلب يبكيك

هو طب غيرك لي يضمد هالجروح ؟
وكاد لأ ينطق بها نبض يبغيك

ان لازمك شك(ن) نقدم لك شروح
و من العذر يا مخاشر الروح نعفيك

لا تسمع لهرج(ن) تجي منه مذبوح
هو من سقاك السم لدواه يعطيك ؟

افهم كلامي مانبي منك مصلوح
العقل ميزانك و بالراي يغنيك

و انا معك إن جيت و ان قلت بتروح
قلب(ن) خذيته يدعي الله ينجيك

بقلمي

فهرس كتاب العمر ترتيبه أيام
سجل بصفحاته ما مر بحياتك

لا تحاول إنك تمحي ما فيه باحلام
بس اجتهد تبني و تعوّض ما فاتك

بقلمي

العمر وان طال لك يا انسان فاني
و من مشي درب السنع يعرف سلومه

أرضى بالمكتوب لو هو ما هناني
و الحزن بالوجه ما نظهر رسومه

جيتي لك ما تقلل من كياني
و لا تهز القدر و النفس محشومه

أدري أني عندكم أحجز مكاني
و ان محلي بالحشا قلبك يرومه

و انت عندي لك قدر عالي و شاني
ما نبيعه لو يزيدونه بسومه

تملك احساسي و حبي لك يباني
منهو يقدر قلبي في حبك يلومه ؟

يبشر ابلبيه قلبك إن دعاني
و منطق(ن) راقي و طيّب في علومه

يا حبيب(ن) يدري به قاصي و داني
يا سليل قروم و شيخ(ن) وسط قومه

من يصدق قول عاذل صار جاني
ضاق صدره و انحرم لذيذ نومه

أنصحك بس لو تركز بالمعاني
تكشف الخافي و تبعد عن سمومه

لا تكابر من عناد بقول ماني
يا وزين العقل من يشري همومه ؟!

بقلمي

هيهات تفهم طبع بعض الخلايق
و لا تفتكر في يوم تكسب رضاهم

ما كل لبس(ن) تلبسه يجي لايق
و بعض البشر صعب التناقش معاهم

ما كل شخص(ن) للصراحه هو طايق
دوم الظنون تسد درب التفاهم

بقلمي

دهليز قلبي قافل الباب عقبك
ممنوع غيرك له تمر المشاعر

نعم أحبك ما عرف غير دربك
و الشوق في بعدك لي الجوف ساعر

بقلمي

همي وجودك يشلعه من عروقه
و يزرع بداله فرحة(ن) ما لها اقياس

يا شف قلبي و محتوي كل شوقه
حبك تمكن و اعمى عيني عن الناس

بقلمي

صباحك يا بعد كلي صباح الورد و عطوره
يا جعل السعد في يومك ملازم دوم لدروبك

صباحك يشبه النسمه و يعطي للفرح صوره
يا مرحب و الله و أهلين يا فرحة من جلس صوبك

بقلمي

سيّر علينا يا هلا و الف ترحيب
لا تجهد افكارك و تندب نصيبك

هات الكلام اللي من العام به ريب
و لا تحسب احساب الزعل من حبيبك

من قلبي عذرك لي يقدم بترتيب
يسد درب العاذل إن جا يعيبك

بقلمي

الإحساس بالآخرين
نعمة و بذات الوقت نقمة
جميل أن تشارك الآخرين مشاعرهم
تفرح لفرحهم و تحزن لحزنهم
هنا بالمشاركة
يكون الإحساس نعمة
و لكن حينما يصل إليك
الإحساس بالخداع
هنا يكون نقمة
تتمنى لحظتها أن تكون
بلا احساس
لتتمكن من التعامل
مع المخادعون .

بقلمي

نهر المحبه صافي ما شي يشوبه
و البعد ما يمنع لحبه نصوني

و مع اني أحبه و اتبعه في دروبه
مسكنه في حوفي و تصمه عيوني

رجيت قلبي يمنع الشوق صوبه
مابي يجيني ما يهيض شجوني

بقلمي

اليوم فرحي مختلط فيه غِيره
كانت تبي تسمح لقلبي يتهور

و الحمد لله يوم عقلي مديره
حماه قبل الأمر فيه يتطور

كنت أنوي أسرد معه للحب سيره
و اوقف بوجه اللي تحاول تسور

أغار و مابي غيري يقرب مسيره
حبي له اكبر مما قد هو يتصور

بقلمي

اهرج لا تكتم ما تقوله عيونك
لا تترك ظنوني تتوه بمعانيه

سولف على قلب(ن) حلف ما يخونك
تدري بحبك عاليات(ن) مبانيه

من غيري تشكيله و تضمن يصونك
هات الكلام الضيق لك ما ندانيه

بقلمي

قلب(ن) سكنته احتفى بك بالاطياب
و قدر المعزه ما تقيسه معايير

ينطق من احساس المشاعر بلا حساب
و الشوق يبعث لك بصدق التعابير

حب(ن) شريف(ن) يرفع الراس ما هاب
صوّر لك أحبَك بأرقى التصاوير

لا تتبع هروج(ن) لكم تقفل الباب
تحبسك وتمنع ما تجيك التباشير

تهويل عاذل يفرحه قلبك يصاب
يخدع بصرك و يمشي بك للتعاسير

مردنا حنا البشر نرجع تراب
وش له نجيب العوق درب التياسير

يا متلف(ن) روحي تفكَر بالاسباب
تلقى الأمر يمضي و سهل المشاوير

بقلمي

جيت اتناقش بنهي شك(ن) بفكري
هو حرفي يوصل مثل ما ابغيه معناه ؟

جمعت لي كلمات من بعض سطري
قلت اتهقينه ينتظر ما نظمناه ؟

قالت حقيقه بالزمن دوم تجري
من ابتعد عن ناظر الخل ينساه

قلت اسمحي لي و لا تقولين مدري
قلب(ن) يحبك كيف حزنك هو يرضاه ؟

وشلون عندي في بعاده هو يطري ؟
قولي علامك وش دليلك انا اتناه ؟

قالت كلام الليل ينهيه فجري
و الشمس تظهر كل حرف(ن) عنيناه

قلت المحبه الصادقه دم يسري
فالعرق لامن ثبتوا ساس مبناه

خلي بعيد(ن) أو قريب(ن) هو عطري
و انا به أدري ما في غيري تمناه

يا حرفي مني اقبل اليوم عذري
ما اقنعت عقلي و خاب ظن(ن) رجيناه

بقلمي

لهيت عن نسياك مع فكر شارد
جلس يسامر طيف سيّر علينا

أخذ يسولف للكدر صار طارد
عرفت وش له ما في يوم(ن) سلينا

بقلمي

بيّنت لك مكنون خافق يناجيك
يوصل لقلبك حس ما هو بمرسال

مني سلام(ن) لك تحيه لمعاليك
معه المشاعر نبض من دون مكيال

بقلمي

لا تنزعج يا بعد حيي و ميتي
يا كاسب(ن) طيبه من ابوه و جده

لو تبعد الاميال يوصلك بيتي
يا محيّر التفكير بيّحت سده

هدي لي جفن(ن) عاندك ما يبيتي
طمنّه بيتك فالحشا ما نهده

بقلمي