الأحد، 30 ديسمبر 2012

فيك الوصايف تجمع الصعب و اللين
في كل موقف حكمتك تفرض الراي


بقلمي
أتل ونه من وجع مزع الروح
سبت تجاريح البشر دون تبرير


و زاد الونين اليوم فتّق لي جروح
سؤال ما يوفي لاجابته تقرير


حبست سطر(ن) ودي ابني له صروح
يوم(ن) طعن في غزو ما جاه تحرير


بقلمي

الجمعة، 28 ديسمبر 2012

ودي بحرفي انقش اسمك و ازخرف
و كل ما جمعته و ابدي أرسم تبعثر


يوم(ن) سألته ليه ؟ ودي انا اعرف
يقول له هيبه سببها اتعثر


بقلمي

الخميس، 27 ديسمبر 2012

أبطى عسى ما شر يمنعه عنا
صاحب يمد العون في كل الاوقات



لا ضقت و جيته حقق اللي تمنا
يالله عساه بخير فخر الصداقات



بقلمي

 
الصبر لامنّه حصل بين خلين
لا تحسبه ينقص من القدر و الشان



يستاهل المحبوب ترخص له العين
دوم الغلا يدمح لزلات الانسان



بقلمي

 
إن جاك ناقل للهروج الرديه
إقطع عروق الوصل بينك و بينه



و احذر من أرضه دايم(ن) هي طريه
لا تامنه لو مدها لك يمينه



بقلمي

 

الأربعاء، 26 ديسمبر 2012

أكشف خفايا النبض من نظرة العين
و اعرف مشاعر خاطرك دون تعبير


احذر تغش احساس قلبي بسطرين
أنا ادرى بك لو صار بالحال تغيير


بقلمي
نهل عبرات الألم في غيابك
و لحظة حضورك بسمتي تخفي الدمع



مابي تضايق يوم انا ابدي عتابك
مسموح و زلات الغلا تذوب كالشمع



بقلمي
راحت من الذكرى دلايل جحودك
و لا عاد به باقي سوى طيب قلبك



يا مكمن الاحساس احفظ عهودك
و انا على وعدي للوجاع طبك



بقلمي

 
يهولك بفعل(ن) على البال ما مر
و يهدم مفاهيم الغلا و المعزه



صاحب مخادع يقلب الخير لك شر
حتى يباعد عنك منهو تعزه




بقلمي

 
ناهيك كم مره و لا تسمع الشور
ما كل من يضحك لكم نيته خير




بقلمي

هذا الزمن


يبي تكون قوي الباس


و انا ما امتلك غير


طيبة القلب و حسن الظنون





و هذي بضاعه خاسره


ما يشتروها الناس


بقلمي

الاثنين، 24 ديسمبر 2012

يسأل و اجابت ما سأل عارفينا
أنا شموخي ما يجي له على الكيف



منهو يبينا بالعقل هو يجينا
ديمه و نستاهل مشاعر بلا زيف



بقلمي

 
طيب النسايم مع صباحك يجي بالخير
يشرح صدر مغليك و يزيد من شوقه



لو تبعد الايام صعب الدروب تسير
يا معاند احساسك دمعك جرح موقه



حرفي يجي باوراق رتبته بتسطير
نقش(ن) غلافه ذوق لك خص انا اسوقه


بقلمي
أهتم باحواله و لي زاد الهموم
ما يقتنع بالقول و يعصى النصايح



بقلمي

الأحد، 23 ديسمبر 2012

يزعجني بعض احيان تغريد عصفور
أحسّ نبراته ونين(ن) و آلآم



كنّه يقول مّكدّر الحال مقهور
يصرخ من اوجاع الزمن صار منضام



عزي له الكل يحسبه شقشق سرور
ما يدروا ان الحزن بالطير قد حام



بقلمي

السبت، 22 ديسمبر 2012

يهمل مشاعر بالحكي يجرح الروح
و يطالبك باسلوب تلزم به الذوق



عجيب منطق هالبشر زاد الجروح
حسن الظنون يعاب و العذر محقوق



بقلمي

يا مقاطع القيفان يا اصعب حروفه
بيوت الشعر تنعى تصاوير الاحساس



السطر يبكي و المشاعر تحوفه
تخفي الدمع ما ودها يصيبه الياس



بقلمي
إهانة المشوار تقليل شانه
بزلت لسان(ن) ما تقدّر معاليك



ينسى المخاوي لك تعبكم عشانه
بعض الرفاقه صعب طبعه يخاويك



لو ترخص الغالي لرفعت مكانه
يتعبه مرقاب الغلا لو يجاريك



بقلمي

الجمعة، 21 ديسمبر 2012

أعجبني تغريده و هيض شجوني
طير(ن) على غصن الشجر يصدح الحون


جيت أسأله و خيّب هقاوي ظنوني
قال البشر تنسى و لا عاد تطرون


بقلمي
رتبت فكري لجل خاطر عيونك
أبيك لا ناديت لي قلت لبيه



نظمت قافي وادعي ربي يصونك
لا ما نسيتك جعل من قال نبكيه



بقلمي
يا غــلا كفي دموعك لا تزيدين الهموم
قالها خاطر تعومس هد حيله بعدهم



شب بالخافق لهيب و زاد به ريح السموم
نوح مع فكر(ن) خياله عيا ينسى ودهم



بقلمي

الخميس، 20 ديسمبر 2012

تسألني


ليه أناظرك و أبتسم ؟
ليش ينطق
احساس الحزن عندي
رغم صمتي ؟



بسمتي لأني فرحانه بوجودك
و الحزن يجيبه لي

الخوف من فقدك


أنا بعد ربي مالي سواك .


بقلمي

 
ناديت باسمك و العرب حاضريني
كنت احسبني جالسه بس لحالي



الله يسامح طيف دايم يجيني
أنسى الاوادم معه أعيش بخيالي



بقلمي
نكتب سطور(ن) حبرها من دموعي
خطيتها بعروق قلب(ن) تمزع



باحساس مر(ن) وسط كبدي يلوعي
بدى انتشاره في حشايه توزع



كل ما نهيت و قلت تكفى يفوعي
يقول بعض الهم صعب يتزعزع



بقلمي
إن جاك من صاحب عتب لا تحسس
ما يصّدقك غير الصديق الصدوقي



يخاف من عاذل عليكم تجسس
يظهر وداد و في وعودك يبوقي



بقلمي
إن كان ما ودك تقدّم معاذير
خذ راحتك خلك يقدّر ظروفك


خل الأمر يمشي بدرب التياسير
يفداك جرحي دام عيني تشوفك



بقلي
يمكن يجي بالهرج شك(ن) و ريبه
فاحرص قبل تحكم تأكد من النص



بقلمي
الله يقبل دعوة الخير للغير
و يجازي الداعي من الفضل رحمه



بقلمي

الثلاثاء، 18 ديسمبر 2012

طريقك لا تماشي فيه من يتعب مشاويرك
تخيّر قلب ما ينّطر على الزله يجافيكم


بقلمي

رهنت روحي و المشاعر و الاحساس
مع نبض عرق و قلب بين الحنايا



لمن ملك شوقي و حبه بلا اقياس
مني احتوى فكري و عقله معايا




بقلمي


 

الاثنين، 17 ديسمبر 2012

له بصمة(ن) شوقي تهيض شجونه
يفز من شوفت سطرها فؤادي


بقلمي

حييت يا نبض(ن) على القلب غالي
ما نرخصك و بعالي السوم نشريك


بقلمي

يا صادق الوجدان لا تختبرني
لا تخفي حروفك و تبخل علينا



أدري بشوقك فالحشا ينتظرني
و تدري المشاعر عنكم ما سلينا



بقلمي

 
نهديك من عذب المعاني تعابير
مع صادق الإحساس يروي المعاليق


بقلمي

نادى الفؤاد و جاوبه حس عاجز
عيا لبعض الطبع يفهم و يقبل

بقلمي
يبني المعاني فكر باحساس و شعور
أسس له الواقع و نسج الخيالي


حتى يجي التعبير و ينقش له سطور
و يصور لوجدان شامخ و عالي



بقلمي

الأحد، 16 ديسمبر 2012

إفهم قبل تسرج لسانك في ميدان
إنك إذا صنته تجنّب إهانه



اسبق لمعنى الطيب و تفوز يا انسان
مضمار حرفك لا تدنّي مكانه


بقلمي






 
الكلمة

أحيانا ظاهرها يجرح

مع إن اللي قالها ما يقصد التجريح
في ناس اسلوبها جاف لكن قلبها طيب
الكلمة عشان تفهمها
لا تكتفي بالسمع بس
شوف وجه من ينطقها
لأن تعابير الوجه هي اللي تبدي لك الخافي
منها تعرف وش المقصد من الكلمة
هل هي عابره أو التجريح قاصده
ما دمت ما تنظر لعين محاكيك
لا تظلمه و تقول جارح .
بقلمي

السبت، 15 ديسمبر 2012

لك بالمعاني كلمة(ن) ما تثنّى
تعبيرها يشبه وضوح التصاوير



يصوغها اسلوبك لنبض(ن) تسنّى
بحروف ما تتعب معك بالمشاوير



وصف المشاعر حسها ما تعنّى
تنقش لها رسمه كزهر النواوير



بقلمي

الجمعة، 14 ديسمبر 2012

مد اليمين اللي لها اليد مديت
خلني اسير الدرب يازين وياك


دامك على درب السنع ما تعديت
أبشر بنفس(ن) طيبه ما تعداك



بقلمي


 

الخميس، 13 ديسمبر 2012

لك بالضماير نبض شوقه يناجيك
أمنعه عنّك غصب يا ضي هالعين


ما ودي يوصل ثم اكدّر معاليك
أبنتظر حتى يجي خاطري زين


نعم زعلت و مابي اليوم احاكيك
و بأجل اعتابك إلى بعد يومين


ما ابغى بكلمه أجرحك ثم أواسيك
تهدى النفوس افضل يجي بالحكي لين


بقلمي
اعرف قدر نفسك و تكسب رضاها
و من اقتنع بالأمر فاز بكنوزه


بقلمي
قك ما تجي لك بالمعاني الصحيحه
و ان شلت نقطه فك عجز التعابير


بقلمي
هه إذا شديت في وسطها الدال
تعطيك فعل امر(ن) لمن خان هدّه


بقلمي

الأربعاء، 12 ديسمبر 2012

يا شارد التفكير وش عاد به زود ؟
ما يرد لو تذرف دموعك سكايب



إما دعاة(ن) تجلب لصاحبك فود
أو يا خساره ما تفك الصعايب



بقلمي

السبت، 8 ديسمبر 2012

أهرب بنظراتي عن مشاهد العين
أخاف لا تكشف عيونه دموعي


يفرض عليّ الجيم لا قدّم السين
و تخنقني العبرة و همي يفوعي



مبغا  يجي من سبتي خاطره شين
غالي تمكّن وسط حدب الضلوعي



بقلمي

الجمعة، 7 ديسمبر 2012

لا تناظرني بخوف و تختفي
مابي شر(ن) بإذنه الله الكريم


هي صخونه كم يوم و تكتفي
ترحل و حالي يجي طيب سليم


و المشاعر من فرح بي تحتفي
و تشكر لخالق بحالك هو عليم


بقلمي

الثلاثاء، 4 ديسمبر 2012

إن جيت تحكي عقلك اسلوبه يجيد
يتبع مفاهيمك و لو ما تكلّم


ينقل لك المعنى على كيف ما تريد
تفكيرك اللي من دروسك تعلّم


بقلمي

الأحد، 2 ديسمبر 2012

عشقك إذا بدّل غرامك بثاني
لا تدمع عيونك عليه أو تألّم



من قالها لك ما صدق بالمعاني
وكاد ثبت من الهوى ما تعلّم



كيف امنع دموعي إذا الحظ شاني ؟
و تفتيت قلبي عقبهم صعب يلّم



هرج القفا يذبح مع الوقت يباني
من صدّقه خسران و لو ما تظلّم



إن كان خلك فالحشا له مكاني
لا تسمع لغيره إذا ما تكلّم



بقلمي

السبت، 1 ديسمبر 2012

يا صاحبي فقدك جرح خد غاليك
و ادمى فؤاد(ن) ما يدوّر بديلك


و بالحلق غصه خطر تذبح مجافيك
من كسر خاطر بالهموم ايعديلك


إن كنت تسمع فالمعاني تناجيك
يسوقها شوق(ن) منعته يجيلك


أمشي على جمر اللظى و لا أحاكيك
لو شف كيفي كم تمنى ايعنيلك


و الجم للهفة نبض باسمك تناديك
و لوجعني حبك صحت يالله دخيلك


بقلمي