يا طير يومك لي تسمع ليت تفهم كلامي
كنت ابهرج عليك و منك باخذ نصيحه

صوتك الشادي هيضني و جدد ألآمي
رافقه هاجس(ن) أوجعني ربي يبيحه

ليتني معك انا اقدر بس اوصل سلامي
أو أطمن قليبي قبل يسكن ضريحه


تاه حرفي عن التعبير وسط الزحامي
بين فكر(ن) حاير(ن) مع مشاعر جريحه


ليت ترفق يا طير الناس تسأل علامي؟
لا تستبيح الدموع و تستثير القريحه

الصمت ما هو عجز و النور يطمس ظلامي
و الخير تشرق شموسه بالنفوس الصريحه

إصدح بتغريدة(ن) يمحي صداها الملامي
و اهديك مني تحيه طيبها فاح ريحه

بقلمي